Prorroguen dos años la prisión provisional de tres de los acusaos de matar a Ardines

L'Audiencia estima que tien que primar la necesidá de conxurar el riesgu de fuga

L'Audiencia Provincial d'Uviéu acordó esti xueves la prórroga de la prisión provisional, comunicada y ensin fianza, pol plazu máximu adicional de dos años, de tres acusaos de matar al conceyal d'IX en Llanes, Javier Ardines.

La Sección Segunda emitió tres autos nos qu'alcuerda la prórroga hasta febreru de 2023 del presuntu inductor, Pedro Luis N.; l'acusáu de ser l'intermediariu, Jesús M., y del supuestu sicariu arxelín Djillali B., al considerar qu'esta midida cautelar ye imprescindible p'algamar la finalidá persiguida de garantizar la presencia de los tres nel xuiciu.

L'Audiencia acordó esta midida al cumplise dos años de prisión preventiva y estimar que tien que primar la necesidá de conxurar el riesgu de fuga.