Riopedre asegura que nunca tomó una decisión "inxusta, illegal o irregular"

La vista pal ingresu en prisión del casu Renedo va ser el 25 de setiembre

L'ex-conseyeru d'Educación José Luis Iglesias Riopedre, condergáu a seis años de prisión nel xuiciu del "casu Renedo", afirmó que, magar que pudo cometer "erros", enxamás adoptó una decisión "inxusta, illegal o irregular", y aseguró que nunca s'apoderó de dineru público nin recibió dineru privao nin regalos.

Nun comunicáu unviáu a los medios, Iglesias Riopedre afirma que nunca dio un tratu de favor a nenguna persona o empresa y que tampoco pidió a naide "remuneración, gratificación, regalu o pagu dalgunu" poles sos decisiones como conseyeru.

"Almito que pudi cometer erros na mio actuación, y que pudi ser imprudente nes mios rellaciones personales o en delles espresiones coloquiales, pero repito qu'enxamás adopté como conseyeru nenguna decisión inxusta, illegal o irregular", conseñó Iglesias Riopedre.

L'ex-conseyeru, que defende la so inocencia porque desconocía les irregularidaes, avanzó que la so defensa va recurrir la sentencia de l'Audiencia Provincial ante'l Supremu.

"Niego que les irregularidaes que la sentencia atribúi a los demás condergaos fueren nin consentíes nin conocíes por min, y espero que'l Tribunal Supremu asina lo declare. Soi inocente y voi lluchar hasta onde faiga falta por demostrar la mio honradez y dignidá personal", diz nel comunicáu.

Iglesias Riopedre espresa'l so respetu escontra'l tribunal que xulgó'l "casu Renedo", al reconocer que los tres maxistraos actuaron "de forma independiente y imparcial", pero considera que "dalgunes de les conclusiones a les que llegaron na sentencia nun son acertaes".

L'ex-conseyeru, de 77 años, foi condergáu a seis años de cárcel polos delitos de prevaricación, falsedá documental, fraude a l'alministración y cofechu, los mesmos que se-y atribuyen a la que fuera'l númberu dos del so departamentu, María Jesús Otero, condergada a nueve años y mediu de prisión.

La sentencia sostién que dambos favorecieron axudicaciones a les empreses acusaes nel "casu Renedo", anque caltién la dulda razonable de que l'ex-conseyeru tuviera al corriente del métodu usáu pola so directora xeneral.

El fallu considera que l'ex-conseyeru convino con Oteru y col empresariu Víctor Manuel Muñiz, d'Igrafo, l'encargu d'estudios pa la implantación de sistemes xeotérmicos de calefacción pa dellos centros educativos de la rexón.

Según la sentencia, en faciendo un fraccionamientu de los contratos pa evitar la so llicitación pública y axudicalos a Nora Proyectos e Ingieniería, los estudios fueron finalmente ellaboraos por una empresa propiedá del fíu del conseyeru, Enrique Iglesias, tamién procesáu na causa y condergáu a responder solidariamente de les indemnizaciones de Muñiz en 99.405 euros en calidá de parte a títulu llucrativu.

El fallu tamién conderga a la funcionaria Marta Renedo Avilés (les sos iniciales formen l'acrónimu que da nome al casu), a 9 años de prisión pola so participación na trama d'axudicación irregular de contratos a empreses.

Los cuatro empresarios xulgaos -Víctor Manuel Muñiz, d'Igrafo; Alfonso Carlos Sánchez, d'Almacenes Pumarín; Maximino Fernández, d'Asac Comunicaciones, y José Azorín, de Nora Proyectos y Ingieniería- fueron condergaos pela so parte a un total de 15,9 años de prisión.

La sentencia conderga amás a un funcionariu del Conceyu de Mieres a una multa de 1.800 euros por cofechu, absuelve a otros cinco emplegaos públicos d'otros conceyos y de la Universidá d'Uviéu y impón a Enrique Iglesias, fíu del ex-conseyeru, al pagu de 99.405 euros en calidá de parte a títulu llucrativu.

L'Audiencia Provincial va celebrar el próximu 25 de setiembre a les 10:00 hores l'audiencia prevista na Llei d'Enxuiciamientu Criminal pa decidir sobre la situación personal de los condergaos pol Casu Renedo.

De cara a esa vista Podemos, que lleva l'acusación particular, yá anunció que va pidir l'ingresu en prisión provisional de los acusaos, condergaos a penes que sumen más de 40 años de cárcel, al entender qu'esiste riesgu de fuga.

La formación morada pidió amás al Gobiernu que se sume al so pidimientu anque l'Executivu adelantó que la so representación llegal na causa va siguir el criteriu qu'afite la Fiscalía.