Salú tresllada a los pacientes del Hospital de Les Arriondes poles inundaciones

Más de 151 llitros per metru cuadráu en dellos puntos del Principáu d'Asturies

Les intenses lluvies cayíes nel Oriente d'Asturies, que dexaron dende la pasada medianueche más de 151 llitros per metru cuadráu en dellos puntos, provocaron les llenes de ríos, cortes y inundaciones en cerca d'un centenar de carreteres y de la llinia ferroviaria ente Piloña y Llanes, y el desallugu dafechu del hospital y de dos centros educativos de Les Arriondes, amás d'un centru de día.

Anque prácticamente toa Asturies ta en nivel de riesgu mariellu por agua y nieve, la lluvia foi mui intensa na zona oriental onde los ríos Seya, Llinares, Bedón, Cares y Deva caltuviéronse a lo llargo de tola xornada n'alerta por un rápidu aumentu de caudal que tamién se dexó notar con intensidá nel Piloña, Ponga o Güeña.

Según los datos de l'Axencia Estatal de Meteoroloxía, Asturies rexistró dende la pasada medianueche les mayores lluvies del país, con 151 llitros per metru cuadráu n'Amieva, 112,8 en Cabrales, 74,86 en Piloña, o 76,4 n'Ayer.

Pa desallugar el complexu hospitalariu hebo que dar d'alta a 26 pacientes y treslladar en 17 ambulancies a otros 29 hasta hospitales d'Avilés (11), Llangréu (15), Mieres (2) y Xixón (1), onde tamién van ser derivaos los 23 pacientes que reciben davezu hemodiálisis nel hospital comarcal del Oriente.

Por procuru, tamién fueron desallugaos cerca de 600 alumnos, profesores y personal que trabaya nel colexu públicu "Ríu Seya" y nel Institutu d'Educación Secundaria "El Sueve", y los tres miembros d'una familia porque la so casa quedó arrodiada pol agua na recta de Lleu, en Piloña, y que fueron evacuaos col so perru pol helicópteru del SEPA.

La evacuación de los colexos y del Hospital Grande Covián de Les Arriondes entamó pasaes les 14:30, malapenes una hora dempués de que'l Gobiernu asturianu pasara de cero a unu'l nivel de riesgu del Plan d'Inundaciones del Principáu (PLANIPA) y de que s'allugara na so redoma un Puestu de Mandu Avanzáu pa coordinar actuaciones.

Hasta esti puestu foi a primer hora de la tarde'l presidente del Principáu, Adrián Barbón, y la conseyera de Presidencia, Rita Camblor, que señaló que nun hai perspectives de que la situación vaya meyorar enantes de la medianueche y que les zones que más esmolecen son les de Villaviciosa, Parres, Ribeseya y la que traviesa'l ríu Deva.

Precisamente, en Ribeseya, la llena del Seya obligó a primer hora de la tarde a cortar dafechu la carretera N-634 al altor de Triongu, y a esviar el tráficu pela carretera N-632 y l'autovía A-8, ente Les Arriondes y Lloviu.

Barbón, pela so parte, llamentó que nun llegaren a tiempu les obres previstes pa evitar en Les Arriondes inundaciones como les qu'en xineru de 2019 provocaron tamién la evacuación del hospital, y que van suponer una inversión superior a los 15,5 millones d'euros.

El Serviciu d'Emerxencies, que reforzó los efectivos de los parques de bomberos de Llanes, Cangues d'Onís, Villaviciosa y Piloña, pidió a la población afectada poles lluvies y les inundaciones qu'eviten o amenorguen los sos desplazamientos per carretera y estremen los procuros, que s'alloñen de ríos, ribayos, riegues y pontes y que nun crucen colos sos coches vaos de cursos d’agua.

Anque en menor midida que nes xornaes precedentes, la nieve tamién provocó güei problemes na rede viaria asturiana, qu'amaneció col puertu de Payares zarráu a camiones y otros seis con cadenes, anque a última hora de la tarde les llendes a la circulación namás se calteníen nos de San Isidro (La Raya) y Ventana.