Taramundi, un conceyu afectáu pola despoblación rural

Nin l'espoxigue del turismu punxo frenu a esta situación

Tenemos que remontanos dellos miles d'años enantes de Cristu pa referinos a la esistencia de vida en Taramundi. Afítenlo restos tumulares en montes y sierres del conceyu.

Más modernos son otros restos, yá romanos, que valíen d'asentamientos pa esplotar un recursu abondante na zona, l'oru.

Les primeres lleis del conceyu fáense en 1584. Llegaba la independencia del conceyu y pa celebralo llantóse un carbayu nel centru la capital del conceyu.

Güei, esi árbol foi sustituyíu por un escultura fecha cola madera del orixinal. El sieglu XVIII vien marcáu pola industria de fierro. Ábrense dellos mazos y fragües, había muncha riqueza natural pa ello.

En 1877 había empadronaos en Taramundi 3.700 habitantes, güei hai daqué más de 600. Una tendencia negativa asemeyada a conceyos que tán na llende.

La emigración tuvo abondo que ver nello. Los pueblos del conceyu fueron quedando despoblaos, la capital del conceyu, sicasí, foi llenándose de cases.

Nos últimos 10 años Taramundi perdió 100 habitantes. Nin l'espoxigue del turismu rural ayudó a poner frenu a esta situación. Nun evitó que la xente ficiere les maletes y colare a otros puntos d'Asturies.

A pesar d'ello, la unida vecinal foi siempre mui fuerte.

Y ye qu'equí l'espíritu de los sos vecinos, precisamente, ye de fiesta. Un calter acoyedor que convirtió al conceyu, dende va años, nun referente d'hospitalidá.