Tola corporación ayerana en 2008, tamién Teresa Mallada, investigada nel Casu Hulla

La xueza que lleva’l casu cree qu’hai actuaciones que faen pensar qu’hubo una infracción penal

La xueza del Casu Hulla amiesta a la llista d’investigaos pola construcción del xeriátricu de Felechosa a tola corporación municipal del Ayuntamientu d’Ayer ente 2008 y 2010, siendo alcalde’l socialista Gabriel Pérez Villalta y vicealcalde’l rexidor d’anguaño David Moreno.

Ente los investigaos, tamién ta la candidata del PP a les autonómiques, Teresa Mallada, qu’entós yera edil na oposición municipal.

La xueza que lleva’l casu acepta la inhibición del xulgáu de L.lena, onde’l partíu local Xente de Aller denunció a tola corporación por un presuntu delitu de prevaricación que la Fiscalía yá señalare na so querella.

Lo que ta nel puntu mira ye la merca de los terrenos al Ayuntamientu de Mieres y la so cesión de baldre darréu al Montepío de la Minería pa facer el xeriátricu. Un alcuerdu aprobáu nel plenu por unanimidá.

Nun autu robláu esti llunes, la xueza que lleva’l casu Hulla cree que dalgunes actuaciones faen pensar qu’hubo una infracción penal. Escontra l’autu de la xueza, pue haber recursu.