Webcams
Buscar
Un xuráu popular xulgará namás a la ma del ñácaru asesináu en Xixón
La xueza aceptó’l pidimientu de la Fiscalía, el sobreseimientu de la causa escontra la so pareya
El xulgáu d’instrucción númberu 2 de Xixón resolvió qu’un xuráu popular xulgue por asesinatu namás a la madre del ñácaru qu’apaeció muertu nun contenedor de basura’l 2 d’agostu pasáu nel barriu de Roces, al siguir el criteriu de la Fiscalía que pidiere’l sobreseimientu de la causa escontra la so pareya.
La resolución comunicóse-yos “in voce” esti llunes, en sede xudicial, de forma presencial al padre y per videoconferencia a la madre, que ta en prisión provisional na cárcel d’Asturies dempués de que’l 23 de setiembre fuere prindada pola Policía Nacional, informaron fontes xudiciales.
La xueza citare a los padres del ñácaru pa notifica-yos “in voce” l’autu nel qu’acordó que la causa siga la so tramitación al traviés d’un tribunal del xuráu.
Na comparecencia, la maxistrada notificó a los investigaos y a les sos respectives defenses que siguirá’l criteriu de la Fiscalía y en base a "la prueba existente" sobreseerá la causa escontra’l pá, de forma que’l procedimientu siguirá únicamente escontra la ma.
A la vista de la decisión xudicial, el pá decidió presentase como acusación particular y exercitará les acciones penales escontra la so pareya sentimental, según fontes xudiciales.
La maxistrada qu’instruye’l casu considera que’l 1 d’agostu de 2019, cuando’l pá del ñácaru colare del domiciliu familiar, la muyer pudo parir un neñu vivu con una edá xestacional estimada en 38 selmanes y, dempués d’envolvelu en toballes, pudo da-y delles puñalaes esperando a que finare por hemorraxa.
