Una alumna de pianu d'Avilés algama'l Golden Classical Music Awards

El xuráu valoró la so capacidá y calidá interpretativa

Henar Fernández Clavel, una alumna de pianu del Conservatoriu Municipal Profesional Julián Orbón d'Avilés, foi premiada col primer premiu del prestixosu certame Golden Classical Music Awards International Competition. La so sede ta nel Carnegie Hall de Nueva York.

Ellí, recibirá'l premiu, nuna ceremonia na que participará como concertista y que sedrá na sala Weill del renomáu odeón neoyorquín, informó esti miércoles l'Ayuntamientu d'Avilés.

A los 13 años, Henar estudia tercer cursu d'Enseñances Profesionales, baxo la tutela de la profesora Lucía González Pérez, y ye alumna de 2º d'ESO.

Participó nel certame con un videu nel qu'interpretaba al pianu la “Danza Ritual del Fuego”, de Manuel de Falla.

El xuráu valoró la so capacidá y calidá interpretativa, lo que-y fizo ganar na categoría de 13 a 15 años.

El Golden Classical Music Award ye una competición internacional abierta a concertistes de cuerda, de vientu, de música de cámara y cantu, de toles nacionalidaes.