Uviéu yá tien la cesión de baldre de los dos edificios de l’antigua fábrica d’armes

L’alcalde d’Uviéu cita los proyectos y usos qu’ocuparán el solar de La Vega

L’alcalde d’Uviéu Wenceslao López, nuna entrevista concedida a TPA Noticies, faló d’una serie de proyectos polos qu’apuesta’l consistoriu p’habilitar nos 2.000 metros cuadraos disponibles nel claustru de La Vega: el Muséu de la Ciudá d’Uviéu, un centru d’interpretación del Prerrománicu, un nuevu archivu municipal y una biblioteca pública.

Uviéu yá tien la cesión de baldre de los dos edificios de La Vega protexíos como Bien d’Interés Cultural (BIC) y que son del sieglu XII.

Al respective de los proyectos definíos pol alcalde, urxe l’archivu municipal, porque’l d’anguaño nun tien espaciu abondo pa conservar de forma afayadiza los documentos.

L’alcalde d’Uviéu yá trabaya nos sos usos darréu, que pasaríen por acordonar la zona del claustru y la capiella p’abrilos al públicu.

L’otru edificiu cedíu ye la capiella d’El Cristo. Tien gran valor históricu con 150 metros disponibles. Pal alcalde, ye un sitiu afayadizu pa facer esposiciones culturales.

Pero en La Vega entovía queden 40.000 metros cuadraos edificaos que pasarán a ser propiedá municipal, dempués de roblar un conveniu con Defensa enantes de mayu.

El plan especial d’ordenación urbana de La Vega determinará los usos industriales a futuru. La idea que se plantega ye suelu municipal y equipamientos onde puen entrar empreses privaes. Los sectores tamién tán definíos: Biotecnoloxía, parque industrial tecnolóxicu, recintu ferial, y fábriques culturales.