Villa, obligáu a dir al xulgáu pa siguir col xuiciu por apropiación

Un testigu denuncia "torgues" pa investigar les cuentes de Villa

L'ex-secretariu xeneral del SOMA-UXT, José Ángel Fernández Villa, foi obligáu a comparecer güei énte la Sección Tercera de l'Audiencia Provincial que lu xulga por un delitu d'apropiación indebida dempués de que nun fuere a la hora señalada pa volver a entamar la vista oral

La so abogada defensora, Ana García Boto, sí que foi a la hora prevista, les 10:00, con un informe médicu sobre l'estáu de salú de Villa, que la selmana pasada volvió a ser hospitalizáu dos díes nel serviciu de Cardioloxía del HUCA, pero que yá ta na so casa dende'l pasáu vienres.

Sicasí, el tribunal de la Sección Tercera de l'Audiencia Provincial desestimó les alegaciones de la defensa sobre l'estáu de salú del so veceru y alcordó que Fernández Villa compareciere énte'l tribunal pa poder siguir la vista oral del xuiciu, lo que fizo a les 10:30.

L'ex-líder sindical mineru ingresó nel HUCA'l pasáu día 18, dempués d'una xornada na Audiencia Provincial na que la declaración del líder del SOMA d'anguaño, José Luis Alperi, llevó a Fernández Villa a dicir na sala que lo que contaba yera mentira.

Al evolucionar favoratiblemente, Villa foi dau d'alta dos díes dempués, el día 20, y dende entós tuvo na so casa.

Un testigu denuncia "torgues" pa investigar les cuentes de Villa

Ricardo Antuña, únicu miembru de la Xunta d'Alministración del SOMA-UXT que cuestionó la contabilidá del sindicatu na etapa del ex-secretariu xeneral José Ángel Fernández Villa, aseguró güei que los sos compañeros "punxéron-y toles torgues posibles" cuando pidió que se-y facilitaren les cuentes del sindicatu "de forma detallada".

El testigu declaró qu'eses torgues viníen del fechu de que "nun entendíen" la so forma de proceder al cuestionar una contabilidá que daben por válida.

Ricardo Antuña caltuvo que les esplicaciones que-y daben yera que "too taba correcto y dicíen que yeren miseries los gastos de colonia que yera un detalle pa les muyeres que collaboraben na fiesta de Rodiezmo".

La Sección Tercera de l'Audiencia Provincial d'Uviéu entamó esta mañana'l xuiciu escontra Fernández Villa por un delitu siguíu d'apropiación indebida, pol qu'afronta una petición fiscal de cinco años, pol supuestu desvíu de 434.158 euros del sindicatu pal so patrimoniu personal.

Ente los péritos que ratificaron los sos informes de mano prestó declaración Mariano Bel, que caltuvo que nes cuentes del SOMA había "montones de salíes de caxa" que nun se sabía "a qué se debíen".

Sicasí, afitó qu'había un gran descontrol contable porque "había abondos errores".

"Nel mio informe describo la variedá d'errores que detecté porque les factures por sí soles nun significaben nada", señaló'l péritu na vista oral.

El péritu insistio en que'l so informe nun ye una auditoría, pero eso nun-y impidió reconocer que nes cuentes analizaes viere que "los movimientos de caxa son brutales y nun se conciliaben les cuentes".

Na sesión de güei declararon dos péritos pal tema económicu y el péritu Francisco Diego Llaca, qu'alvirtió qu'en dellos casos la robla qu'apaez nun se correspuende cola de Fernández Villa, sinón que ye "la d'otres persones".

Nesta xornada tamién declararon el presidente del Montepío de la Minería y ex-secretariu d'organización del SOMA na etapa de Fernández Villa, Juan José González Pulgar, que reconoció que siempres se necesitaben "dos robles autorizaes" para facer efectivos los cheques.

Pela so parte, l'ex-presidente d'Hunosa Juan Ramón García Secades ratificó les sos declaraciones anteriores na vista oral celebrada na Audiencia Provincial.

El xuiciu va siguir el próximu miércoles, día 25, colos informes de les conclusiones definitives.

Casu Hulla

Sobre otru procesu xudicial nel que ta inxertu Villa, el caso Hulla, el presidente del Montepío, Juan José Pulgar, insiste en qu'hai qu'investigar la compraventa y permuta de los apartamentos de Roquetas del Mar y Los Alcáceres.

Unes dilixencies que la Fiscalía abrió n'agostu del pasáu añu y archivó un mes depués al entender que los fechos investigaos taben prescritos. Dende'l Montepío insisten en que s'axunten a la causa.