Xixón confirma la so intención d'inxertase a la rede autonómica d'escueles infantiles

Los docentes de Llanes quéxense pola falta de mantenimientu y llimpieza nos colexos

L’alcaldesa de Xixón, Carmen Moriyón, afitó esti miércoles la intención de que la ciudá puea inxertase a la rede autonómica d’escueles de 0 a 3 años, qu’entamará a funcionar dende’l mes de setiembre viniente.

Moriyón fizo estes declaraciones al traviés d’una nota de prensa dempués de la xunta cola conseyera d’Educación del Principáu, Lydia Espina.

D’esta manera, Educación amiesta’l sofitu d’un total de 25 ayuntamientos ente los que tán Xixón y Uviéu, informó’l consistoriu.

Los docentes de Llanes quéxense pola falta de mantenimientu y llimpieza nos colexos

Los directores de dellos colexos públicos del conceyu de Llanes quéxense de la falta de llimpieza y mantenimientu de los centros educativos.

Los directores del Valdellera de Posada, del Peñatú de Llanes, de los colexos rurales de Nueva y los agrupaos 1 y 2 roblaron un manifiestu pol que reclamen al Ayuntamientu’l cumplimientu de les sos responsabilidaes.

Los denunciantes aseguren que lleven munchu tiempu alertando de la deficiente llimpieza, la falta de mantenimientu y la nula dilixencia nes reparaciones.