Afayen mutaciones nuna zona inesplorada del xenoma de célules tumorales

Consorciu internacional d'investigadores con participación de la Universidá d'Uviéu

Investigadores españoles y canadienses consiguieron descifrar rexones hasta agora inesploraes del xenoma de célules tumorales y identificaron dos mutaciones, una presente na leucemia linfática crónica y otros tumores y otra que ta en más de la metá d'un tipu de meduloblastoma.

Dos investigaciones, qu'esti miércoles asoleyó la revista 'Nature', demuestren que les rexones escures del xenoma, qu'inda nun fueren esploraes por cuenta de la so complexidá, tienen mutaciones relevantes pa entender el desarrollu de distintos tipos de cáncer.

Los trabayos lleváronlos alantre científicos d'un consorciu d'investigadores del Centru d'Investigación del Cáncer d' Ontario y l'Hospital for Sick Children de Toronto, l'Hospital Clínic-IDIBAPS de Barcelona y la Universidá d'Uviéu.