El Principáu creará polos d'anovación en terrenos lliberaos poles térmiques

El conseyeru de Ciencia defende aumentar la inversión n'I+D-i pa retener talentu

El Gobiernu asturianu impulsará la creación de polos d'anovación en terrenos lliberaos de les centrales térmiques y desendolcará proyectos de gran valir p'aprovechar vieyes galeríes mineres.

Asina lo confirmó'l conseyeru de Ciencia, Anovación y Universidá, Borja Sánchez, nuna comisión parllamentaria onde dio cuenta de les llinies xenerales del so departamentu pa esta llexislatura.

El conseyeru defendó qu'Asturies, quinta comunidá autónoma en términos d'atracción y retención de talentu según el mapa del talentu d'España en 2019 de la Fundación Cotec, llegue al final de la llexislatura dedicando un 2% del Productu Interior Brutu (PIB) al I+D+i, cuando anguaño se destina'l 0,8%.

Según afirmó, l'acción política del so departamentu ordénase en seis grandes exes que pasen por definir una estratexa científica rumbu 2030, retener y atrayer talentu, potenciar l'acción de la Universidá d'Uviéu, fomentar la collaboración público-privada, reducir la burocracia y divulgar y esparder la ciencia.

El conseyeru afirmó qu'una de les misiones científiques que definirá l'Asturies del futuru tendrá como oxetivu la economía circular, la transición enerxética y la caltenibilidá.