Algamen avances na precisión pronóstica de la metástasis del cáncer de mama

Investigación de la Universidá d'Uviéu y de la Fundación Hospital de Xove

Personal investigador de la Universidá d'Uviéu y de la Fundación Hospital de Xove algamaron nuevos avances na precisión pronóstica de la metástasis del cáncer de mama. L'oxetivu de la investigación, asoleyada na revista 'Histopathology', ye amenorgar la cifra de muyeres que se someten a tratamientos como la quimioterapia dempués d'una operación.

L'estudiu, fechu sobre 246 muyeres asturianes operaes de cáncer de mama ente 1991 y 2012 y que se sometieron a siguimientu clínicu, amosó'l potente valor pronósticu de la espresión tumoral de la estromelisina-3 pa predicir el desendolcu de metástasis, según informó esti miércoles la Universidá d'Uviéu nun comunicáu.

La espresión de la estromelisina-3 poles célules inflamatories intratumorales foi'l factor estadísticamente más potente pa predicir el desendolcu de metástasis, al identificar un 84,6% de les muyeres del grupu que la desendolcaron dempués d'una ciruxía aparentemente curativa.