Primer aniversariu de la muerte de Margarita Salas

Una escultura n'honor a la científica asturiana en L.luarca

Cúmplese'l primer añu del fallecimientu de Margarita Salas. Como homenaxe a la investigadora valdesana, el Gobiernu del Principáu promueve los premios "Ciencia nel Aula". La idea ye fomentar les vocaciones científiques ente l'alumnáu de Primaria y Secundaria.

Na Selmana de la Ciencia, anguaño con actividaes online, el Principáu convoca estos premios, col enfotu de poner en valir el métodu d'investigación científica y combatir la fienda de xéneru nesti tipu de disciplines. Va tar dotáu con 10.000 euros destinaos a la compra de material escolar.

Margarita Salas reconoció en delles ocasiones que los sos empiezos como muyer investigadora nun fueron fáciles. Entamó la so tesis doctoral en 1961, cuando n'España entá se creía que les muyeres nun taben capacitaes pa investigar.

En 1964 entamó la so estancia postdoctoral con Severo Ochoa en Nueva York. Viaxó col so home Eladio Viñuela, anque'l premiu Nobel propúnxo-yos investigar separtaos. Salas reconoz qu'eso la ayudó a reivindicar la so valía.

Con Margarita Salas entamó'l desendolcu de la bioloxía molecular n'España. El so estudiu del fagu Fi29, un virus qu'infecta a les bacteries, dexó conocer cómo funciona l'ADN.

Margarita Salas, inclusive dempués de la so xubilación y cercanos yá los 80 años, siguía diendo al llaboratoriu a investigar.

Una escultura de bronce n'honor a Margarita Salas

Una escultura de bronce n'honor a Margarita Salas. El 27 payares va asitiase en L.luarca una escultura de bronce de 200 quilos n'honor a la científica asturiana, que va compartir allugamientu col que foi'l so maestru, Severo Ochoa.

Margarita Salas ye, ensin dulda, la científica asturiana más relevante de la hestoria.

Por eso, a finales d'esti mes va tener una escultura nel so honor que se va asitiar en Valdés, el conceyu que la vio nacer.

La estatua ye una creación de Sara Iglesias, una artista uvieína que cunta con delles obres nes cais de la capital asturiana, como, por casu, el fotografiáu 'perru Rufu' na cai Doctor Casal.

Nun taller madrilanu tán dándose los últimos rellumos a la escultura de Margarita Salas, el mesmu d'onde salió la figura de Woody Allen.​