ArcelorMittal potenciará los proyectos d'impresión 3D n'Asturies

Gregory Ludkovsky señala que la transición ecolóxica nun pue acometese ensin contar cola industria

El vicepresidente d'ArcelorMittal y responsable mundial d'I+D del grupu siderúrxicu, Gregory Ludkovsky, avanzó esti miércoles qu'unu de los oxetivos de la compañía ye potenciar los proyectos d'impresión 3D nos sos centros, ente ellos los d'Asturies.

A entrugues de los periodistes, enantes de ser nomáu Honoris Causa pola Universidá d'Uviéu, xunto col historiador británicu Peter Burke, señaló qu'otros de los oxetivos de la multinacional ye promover la responsabilidá ambiental nel territoriu y meyorar les formes de los procesos y los productos como l'aceru.

Ludkovsky comentó que la transición ecolóxica nun pue acometese ensin contar cola industria, sinón que tien qu'abordase a comuña con tolos axentes implicaos, ente ellos los Gobiernos y la Universidá, col envís de fomentar l'anovación.