Dellos cientos de persones marchen en Llangréu escontra'l zarru de Vesuvius

CCOO esixe la retirada inmediata del ERE y destaca que la compañía "quedó sola"

Más de 7.000 persones, según fontes policiales, participaron esti llunes na marcha a pie dende la planta de Vesuvius en Riañu hasta la Casa Conceyu de Llangréu pa protestar escontra la desindustrialización de les cuenques mineres, tres la decisión de la multinacional d'aplicar un ERE que va implicar el fin de la so actividá productiva na rexón.

La respuesta sorprendió a la mesma organización, qu'amosó'l so agradecimientu pola implicación vecinal, afitando que ye una amuesa más del cansanciu de la xente por otru intentu de deslocalización inxustificáu.

Trabayadores, vecinos del conceyu, y representantes políticos rexonales y municipales sumáronse a la marcha convocada pol comité d'empresa de Vesuvius, que tamién cuntó col sofitu de miembros del comité d'empresa d'Alcoa.

El presidente del comité d'empresa de Vesuvius, Juan Manuel Suárez Baragaño, aseguró que'l sofitu recibíu supón "una inyección de moral" de cara a la siguiente manifestación, que va tener llugar el día 24 de setiembre n'Uviéu.

Nesti sen, animó a la población asturiana a participar nella, yá que "nun ye solu Vesuvius y Llangréu, sinón el conxuntu de la rexón la que carez de siguíu estes inxusticies".

Pela so parte, el secretariu xeneral de CCOO d'Industria d'Asturies, Damián Manzano, celebró que la cuenca minera "se desbordara" nuna amuesa de solidaridá que reflexa que Vesuvius "quedó sola frente a Asturies".

Los comercios del conceyu sumáronse a les reivindicaciones de los trabayadores y clausuraron los sos negocios hasta les 12:00 como amuesa de solidaridá.