Desigual acoyida ente los sindicatos d’ArcelorMittal al compromisu de Pedro Sánchez

La empresa fai dende mañana paraes de producción

Diferencies ente los sindicatos a la hora de valorar les midíes anunciaes ayeri n’Uviéu pol presidente en funciones p’afrontar la crisis d’ArcelorMittal.

Pa Comisiones Obreres, el compromisu de rebaxar el preciu de la enerxía y asignar fondos estra polos costos indirectos del CO2 son palabres nel contestu de la palabra preelectoral y pide pasar a los fechos.

Pa USO, les acciones anunciaes son un pasu alantre, y pa UXT, resulten fundamentales pa poder competir y pide un frente común Asturies-España.

ArcelorMittal vivirá esti mes dellos axustes d’actividá qu’afectarán a unos 700 trabayadores. L’acería d’Avilés menguará la so producción dende’l llunes énte la falta de pidíos.

Amás, la selmana qu’entra habrá paraes nes llinies d’inspección y dexarán de funcionar los talleres d’acabáu de productos, el taller de cilindros en frío, les dos llinies de galvanizáu y de fueya de lata, el témper, los dos tándem, la llinia de recapáu y la de recocíu de siguío.

En Xixón pararán dellos díes el tren d’alambrón y el tren de chapa grueso. Amás veráse afectada la contrata Daorje y l’actividá de los trabayadores de llaboratorios y calidá.