Gondán bota'l primeru de los barcos contrataos por Portugal pa tresporte de pasaxeros

Son necesaries dos grandes grúes pa echar al agua la embarcación

Astilleros Gondán bota'l primeru de los barcos contrataos pol gobiernu portugués pa tresportar pasaxeros en Lisboa. Son necesaries dos grandes grúes pa echar al agua la embarcación.

Al primer barcu que va viaxar a Lisboa inda-y queden per delantre cinco meses de trabayu, lo necesario pa rematar l'interior d'una embarcación de 40 metros de llargu y con capacidá pa 540 persones.

Ye unu de los 10 barcos que constrúi Gondán pal gobiernu portugués pa tresportar pasaxeros ente la capital del país y la ribera sur. Nel so interior inda queda munchu trabayu eléctricu o la instalación de los asientos de los pasaxeros.

Van ser les primeres embarcaciones nel mundu de tresporte con esa capacidá y que se muevan namás con electricidá.

L'astilleru asturianu ganó unu de los mayores concursos navales públicos internacionales, valoráu en 52 millones d'euros. Con esos barcos, Portugal va poder anovar la so flota de tresporte. La división naval de fibra ta nestos momentos en máximos de carga de trabayu, con otros cuatro barcos ximielgos.