Mediu millar de persones pide en Madrid una solución de futuru p’Alcoa

Los trabayadores ponen fin a la "marcha del aluminiu"

Cuasi mediu millar de persones, ente elles trabayadores d’Alcoa, percorrieron la distancia ente l’estadiu Santiago Bernabéu y el Ministeriu d’Industria, Comerciu y Turismu nuna manifestación na que pidieron una solución de futuru pa les plantes d’Avilés (Asturies) y A Coruña.

Los trabayadores d’Alcoa, qu’acabaron asina la llamada "marcha del aluminiu", qu’entamó’l 13 de xunu pasáu n’Avilés, reclamaron que la solución pa les dos plantas abarque más de los dos años de trabayu garantizáu qu’afita’l proyectu del fondu Parter Capital.

La manifestación, que tuvo encabezada por una pancarta col lema "Non al desmantelamientu de la industria", entamó daqué enantes de les 12:30 nel estadiu Santiago Bernabéu, del Real Madrid.

El Gobiernu siempre tuvo al llau de los trabayadores d’Alcoa y va siguir tando anque s’afite l’alcuerdu pa la venta de les factoríes de la multinacional n’Avilés y A Coruña al fondu Parter Capital, dixo esti llunes el secretariu xeneral d’Industria, Raúl Blanco.