Parter propón una estratexa p'Alcoa con dos opciones de negociu

El Principáu va sofitar la venta d'Alcoa a Parter anque prefería a Quantum

Parter propón una estratexa p'Alcoa con dos opciones de negociu. Si'l preciu de la lluz baxa de los 40 euros el megavatiu hora, volverá arrancar les cubes d'electrolisis. Sedría l'escenariu más favorable nel qu'inclusive, dicen, podríen ampliar plantiya. Eso si se cumple la promesa del Gobiernu de baxar la enerxía eléctrico pa 2020.

Pero por si eso nun socede, van entamar a enfocase dende'l primer momentu a productos d'aluminiu pa la industria automovilística y aeroespacial, reciclando chatarra que va apurrir el so sociu alemán Scholz Recycling Group, perteneciente a unu de los mayores grupos de reciclaxe de metales d'Europa.

Pa ello van invertir 19 millones d'euros por planta y van formar a los trabayadores per 12 meses tanto n'España como nel estranxeru.

Parter espera que les sos ventes y beneficios d'esplotación se multipliquen por tres nestos cuatro años, pasando de 58 millones d'euros a 179 millones.

Les perdes previstes pa esti añu de 29 millones d'euros espérase que queden prácticamente en cero nel añu cuatro, anque nun llegaría a tener ganancies en nengún de los cuatro años del so plan de negociu.

Parter asitia'l so futuru na necesidá d'aluminiu n'Europa onde anguaño, tán importándose 10 millones de tonelaes al añu. El so compromisu de caltenimientu del total de la plantiya ye de dos años.

El conseyeru d'Industria, Isaac Pola, afirmó esti vienres que'l Principáu va sofitar la venta de les plantes d'Alcoa n'Avilés y A Coruña al fondu suizu Parter anque, "dende una perspectiva puramente del plan industrial" vía "más atractiva" la propuesta del alemán Quantum.