Tres trabayadores de Vesuvius zárrense na Catedral d'Uviéu

Van tar nel interior del templu de manera indefinida hasta que se solucione'l conflictu

Tres trabayadores de Vesuvius zarráronse esti miércoles na Catedral d'Uviéu en protesta pol ERE presentáu pola multinacional pa les sos plantes de Llangréu y Miranda de Ebro, que cunten con 111 y 17 trabayadores, respectivamente.

Los tres emplegaos, que quieren defender los sos puestos de trabayu y la "dignidá" de los asturianos y les sos instituciones "énte l'atropellu cometíu pola multinacional británica, van tar nel interior del templu de forma indefinida hasta que se solucione'l conflictu entamáu va un mes.

Tres l'encierru, el deán de la Catedral, Benito Gallego, autorizó la estancia de los trabayadores nel interior del templu y inclusive-yos dio accesu al so despachu.

Gallego, quien tamién dexó que los compañeros de los zarraos-yos dieren cobertores y alimentos, reconoció que "técnicamente" nun sabe cómo pue solucionase'l conflictu llaboral, pero sí cómo ayudar "humanamente", dixo en declaraciones a TPA.

Pela so parte, l'arzobispu d'Uviéu, Jesús Sanz Montes, espresó nuna rede social la so cercanía colos trabayadores de Vesuvius, "si arrasa la esperanza con insolidaria lava", y espresó'l so deséu de que "s'acierte a negociar con eficacia".

La organización sindical, que desque Vesuvius anunció la so decisión entamó numberoses protestes y tres manifestaciones multitudinaries, remarcó que "Asturies nun pue consentir tener que vese na necesidá de facer la reindustrialización de la reindustrialización polos caprichos y intereses económicos d'una multinacional carente de valores y escrúpulos".

Los trabayadores zarraos llegaron a la basílica uvieína acompañaos d'un grupu de compañeros coles camisetes naranxes que tán utilizando nes sos movilizaciones, una d'elles foi llevada'l pasáu vienres polos fíos de dellos emplegaos de Vesuvius al presidente del Gobiernu en funciones, Pedro Sánchez, enantes de participar nun mitin n'Uviéu.

El sindicatu tamién reclamó a la clase política "que se ponga la camiseta de Vesuvius d'una forma clara y rotunda" y apurra soluciones como tán faciendo los representantes de los trabayadores na mesa de negociación del ERE.

Esta nueva propuesta produzse dempués de que la dirección de Vesuvius refugara ayeri la propuesta plantegada pol Gobiernu asturianu d'ampliar el periodu de consultes del ERE y suspender la so aplicación entre cuatro y seis meses.

Na xunta d'ayeri nel Serviciu Asturianu de Solución Estraxudicial de Conflictos (SASEC), la cuarta desque Vesuvius anunció'l cese de l'actividá granible en dambes plantes, el Comité treslladó a la compañía una propuesta pa potenciar l'actividá de les instalaciones y que refuta los argumentos de la dirección pa la deslocalización.

La multinacional, con sede nel Reinu Xuníu, xustificó la so decisión de cerrar la factoría llangreana, dedicada a la producción de productos refractarios pa empreses siderúrxiques, na reorganización de l'actividá que ta llevando en toles sos fábriques europees énte'l deterioru que ta sufriendo la industria del aceru por un escesu de capacidá y la medría d'importaciones de terceros países.

La Catedral d'Uviéu yá foi escenariu en 1997 d'un encierru que s'allargó 318 díes por parte d'un grupu de trabayadores de Duro Felguera tres los despidos qu'hebo nesi grupu industrial.