Vesuvius descarta aplicar l’ERE un añu, pero baraxa aplazalu si se negocia

Nueva xunta nel Serviciu Asturianu de Solución Estraxudicial de Conflictos

La dirección de Vesuvius refugó la propuesta treslladada esti sábadu pol comité d’empresa pa que l’ERE nes factoríes de Llangréu y Miranda de Ebro s’aplicare un añu, anque s’amosó dispuesta a aplazar el presentáu pa favorecer un alcuerdu

Empresa y sindicatos tuvieron esti sábadu una nueva xunta nel Serviciu Asturianu de Solución Estraxudicial de Conflictos (Sasec) pa tratar d’averar postures énte l’espediente de regulación d’empléu (ERE) que la multinacional británica presentó pa parar l’actividá en dambos centros, que dan trabayu a 128 trabayadores.

A falta de dos díes pa que se pieslle’l periodu de consultes del ERE, el grupu británicu dedicáu a la fabricación de material refractario d’usu siderúrxico amosó la so disposición a amplialu "si los representantes de los trabayadores acceden a negociar concretamente na estensión los términos d’aplicación del ERE planteáu".