Italia decreta que’l país enteru quede en situación d’aisllamientu

El brote por Covid-19 remite en China y Corea del Sur

Italia dio un nuevu pasu pa tratar de frenar l’espardimientu del coronavirus. El primer ministru Guiseppe Conte decretó que’l país enteru tien que quedar dende güei en situación d’aisllamientu.

Un estáu asemeyáu al que yá se daba en Lombardía y otres 14 llugares del norte d’Italia.

Los asturianos residentes nel país tresalpín viven la situación con resignación, pero valoren positivamente les midíes tomaes pol executivu italianu.

Les midíes incluyen que los movimientos queden prohibíos en tol territoriu y namás van dexar los que seyan por motivos xustificaos de mou afayadizu.

Otra de les escepciones sedrán les visites médiques, y ye qu’Italia yá superó los 9.000 infestaos y los 450 finaos. A pesar de too, hai delles duldas a rodiu de si la evolución del Covid-19 ye controlable.

Con 1.600 contaxos nuna sola xornada ye’l momentu d’un cambéu d’hábitos y de tomar la situación con muncha más seriedá.

El primer ministru italianu fizo un llamáu pa que los ciudadanos camuden el so estilu de vida y pa que s’adapten a la situación d’emerxencia que tien el país.

En China remite’l brote. Los nuevos casos confirmaos nesti país menguaron a 19. Ye la cifra más baxa de contaxu, qu’amosó una tendencia menguante dende’l fin de selmana.

Les estrictes cuarentenes y los controles de población dieron resultáu. Polo menos ye lo que dicen les autoridaes chines que celebran que los nuevos contaxos sigan menguando.

Esti fin de selmana’l país espertó con menos de 100 contaxos per primer vegada dende qu’entamare la crisis. Ayeri fueron 40 y güei son 19, de los que 17 contáronse na provincia d’Hubei, focu de la epidemia.

Nel mesmu periodu de 24 hores, 1.297 persones fueron daes d’alta en China dempués de superar la enfermedá, según la Comisión Nacional de Sanidá.

Tamién se recupera Corea del Sur. Nel segundu país con más contaxos dempués de China, tamién cayó de mou consistente’l númberu de contaxos nos últimos cuatro díes, baxando de los 100 caldía que rexistrare hasta agora.

A nivel mundial, los casos confirmaos superen los 114.000. Les persones contaxaes que se recuperen de la enfermedá superen el 96%.