El Gobiernu va esixir planes de transición xusta a les eléctriques que cierren centrales térmiques de carbón

Asturies, Aragón y Castiella y Lleón piden alternatives al zarru de les cuenques mineres

Los presidentes d'Asturies, Aragón y Castiella y Lleón, Javier Fernández, Javier Lambán y Juan Vicente Herrera, sollertaron güei de la necesidá de construyir alternatives reales enantes del zarru de les cuenques mineres y de les centrales térmiques, pol impactu que pue haber nesos territorios.

La ministra pa la Transición Ecolóxica, Teresa Ribera, axuntóse güei colos tres responsables autonómicos pa tratar de la transición xusta nes zones afectaes pol zarru de centrales y de mines de carbón.

El Ministeriu va esixir a les compañíes eléctriques que cierren centrales térmiques de carbón planes de transición xusta que dexen dar un futuru a les zones onde tean estes plantes, conseñó'l secretariu d'Estáu d'Enerxía, José Domínguez Abascal.

En rueda de prensa anterior, Herrera calificó la xunta de positiva, yá qu'escucharen dende'l Ministeriu les sos esmoliciones "por una situación llende n'amplies zones" de les sos comunidaes.

N'asegurando que nun quería xenerar "falses mires", indicó qu'estos procesos de transición traen "enormes sacrificios personales", polo que pidió que seya xusta, yá qu'hai otros factores como'l demográficu o la desapaición de l'actividá económica, cimeres pal desenvolvimientu de la contorna.

Lambán recordó que los tres presidentes lleven meses trabayando conxuntamente nel asuntu y que tienen sintonía nes sos posiciones na busca d'alternatives pal zarru.

"La ministra sabe que cunta con nós pa una transición ecolóxica xusta -amestó-, pero ye obvio que tien qu'axuntar requisitos concretos" y apeló a la "responsabilidá social" de les empreses qu'hasta agora esplotaron les mines y les centrales, dalgunes d'elles agora quieren desentendese y tomen les decisiones buscando'l so beneficiu personal.

Al so xuiciu, nun pue haber "un zarru abruptu" en 2020 de les centrales térmiques, porque ello provocaría un "éxodu de población" na contorna más próspera de Teruel, Andorra.

Fernández precisó que tresmitieren a la ministra que "nun somos l'aldega gala" pero que la nueva realidá "nun pue colapsar lo qu'esiste y hai qu'articular l'actividá".

Conseñó que son contornes perifériques y necesiten una "atención especial", yá que delles vienen d'otros procesos de "desindustrialización".

Los tres presidentes convidaron a la ministra a que visite les contornes afectaes, y aceptólo.

Herrera refirióse a la coincidencia con Ribera na necesidá de cooperar na construcción d'esa nueva realidá económica y social neses zones de minería y centrales térmiques, pa lo que pidieron ser escuchaos, porque nn pue "desdexase la realidá actual pa construyir otra nueva".

Indicó qu'una empresa quier caltener la esplotación carbonífera abierta a partir del 1 de xineru polo que pidió tiempu pa la devolución de les ayudes y que nun se retayen los plazos.

Reconoció un acercamientu de la ministra a lo local, a los sindicatos, a los conceyos y a les comunidaes afectaes, que "nun pidimos otra cosa qu'estabilidá, oxetivos y plazos claros".

Pa Lambán, cerrar les centrales en xunu de 2020 ye incompatible con una transición xusta y plantegó que les eléctriques arbitren fórmules pa siguir cola economía del carbón.

Los tres consideraron que'l zarru en 2030 yera una fecha incorporada na so cuenta de resultaos y que si s'acurtien los plazos dáse-yos una sida pal zarru.

Herrera refirióse al fondu européu de 5.000 millones pa proyectos d'escala estratéxica a los que podríen acoyese les cuenques nel so plan de reindustrialización, a que'l Gobiernu d'España tamién va apurrir fondos y les comunidaes tendrán partíes económiques, pero que lo importante ye xenerar redolaes atractives pa que s'alluguen les empreses.

La xunta de la ministra colos presidentes produzse dempués de que l'últimu Conseyu de Ministros aprobara'l decretu-llei de midíes pa la transición xusta de la minería del carbón, que, amás de prexubilaciones, baxes incentivaes y una bolsa de trabayu, afita destinar 100 millones en 2019 a polítiques de transición xusta y llucha escontra'l cambéu climáticu nes zones afectaes.