Participación histórica n'Asturies nuna xornada electoral ensin cuasi incidencies

Normalidá nos colexos y más anécdotes qu'incidencies

L'índiz de participación n'Asturies nes elecciones xenerales ta a les 18:00 de güei nel 58,66% del censu frente al 50,84% qu'exerciera'l so derechu al votu a la mesma hora nos comicios de 2016, según informa'l Ministeriu del Interior.

Nel conxuntu del país, la participación na xornada electoral a les 18:00 de güei ye d'un 60,74%, cuasi 10 puntos percima de la rexistrada nes anteriores xenerales cuando a esta mesma hora de la tarde taba nun 51,21%.

Esti foi'l segundu avance na xornada electoral na que 974.487 ciudadanos censaos n'Asturies, 8.350 menos qu'en 2016, tán convocaos pa escoyer a siete diputaos -unu menos que nos últimos comicios- y cuatro senadores ente les 12 candidatures qu'opten al Congresu y les 11 que lo faen al Senáu.

Xornada electoral: Normalidá nos colexos y más anécdotes qu'incidencies

Los centros abrieron les sos puertes a les 09:00 y van cerrar a les 20:00 na Península y a les 21:00 nel archipiélagu canariu.

La xornada nos colexos trescurre con normalidá. Los típicos olvidos de DNI, dalguna falta y retrasu de miembros de mesa, y coles sobre manera a mediudía.

Los votantes difieren nes sos mires según les edaes. Los más mayores considérenla una votación normal, mentres que los más nuevos creen que van ser unes elecciones especiales.

Tocante a les votaciones per corréu, anguaño contabilizáronse 1,24 millones de votos, cifra inferior a les elecciones de 2016.

Les úniques incidencies que se rexistraron fueron en dos meses d'Uviéu -allugaes nel colexu Buenavista y nel centru social Vallobín II- nes que faltaben los censos de votantes que, tres ser unviaos, abriéronse unos minutos dempués de la hora afitada pal entamu de la votación.

Estes meses van cerrar más tarde, cuasi a les 20:30, pa compensar el tiempu perdíu a primer hora.