Sánchez prescinde de cuatro ministros nel so nuevu Gobiernu

María Luisa Carcedo, víctima de los pactos pa la investidura de Sánchez

Pedro Sánchez decidió dar prioridá a la economía nel so nuevu Gobiernu y nesta segunda xornada d’anuncios sorprendió con perfiles técnicos pa carteres como Esteriores mientres que confirmaba a bona parte de los sos ministros d’anguaño.

En nenguna de les quinieles figuraba la escoyida por Sánchez pal Ministeriu d’Asuntos Esteriores, Arancha González Laya. Una xurista esperta en xusticia internacional qu’enagora, precisamente, dirixía l’ITC, organismu a comuña de la ONU y la Organización Mundial de Comerciu dedicáu a esti campu.

Un economista de prestixu internacional sedrá’l qu’asuma unu de los retos más complicaos que-y esperen al Gobiernu: la reforma del sistema de pensiones. Ye José Luis Escrivá, hasta agora presidente de l’Autoridá Independiente de Responsabilidá Fiscal, que sedrá ministru de Seguridá Social, Inclusión y Migraciones.

Hubo otra sorpresa, nesti casu más política, la de que’l secretariu d’Organización del PSC, Salvador Illa, sedrá’l ministru de Sanidá. Sánchez da asina una cartera a unu de los negociadores qu’algamó l’abstención d’ERC nel Congresu que fizo posible la so investidura.

Nesta xornada na que los anuncios y confirmaciones de ministros fueron sucediéndose, como ayeri, con cuenta gotes, súpose que repetirán otros cinco ministros del entá Executivu en funciones.

María Luisa Carcedo, víctima de los pactos pa la investidura de Sánchez

María Luisa Carcedo pagó’l preciu políticu de los pactos que dexaron la investidura de Pedro Sánchez. Dempués de 14 meses nel Gobiernu, ye una de los cuatro ministros que salen del Executivu xunto cola de Xusticia, Trabayu y el de Cultura.

A esta médica de familia, especialista en recursos sanitarios, sustitúyela en Sanidá un socialista catalán, llicenciáu en Filosofía, Salvador Illa, secretariu d’Organización del Partido Socialista de Cataluña.

Un fechu que nun pasó por alto’l PSC y que’l so secretariu xeneral, Miquel Iceta, celebró en twitter. Colectivos sanitarios, como’l Conseyu Xeneral d’Enfermería llamenten qu’Illa nun tenga la conocencia del sector que tenía Carcedo, de la que destaquen tamién un talante dialogante.

Nel so mandatu punxéronse en marcha dalgunes terapies avanzaes o inxertáronse na seguridá social fármacos pa dexar de fumar. Opúnxose a les pseudoterapies y dexa pendiente la prohibición de fumar en coches o, n’Asturies, la puesta en marcha del centru de mancaos medulares en Llangréu, del que dio cuenta nes sos visites de los últimos meses.

Carcedo dexa un ministeriu qu’agora dixébrase en tres carteres, Consumu con Alberto Garzón, Bienestar Social con Pablo Iglesias y Sanidá pa Salvador Illa.