'Migravit' recuerda los comportamientos de la sociedá medieval énte la muerte

Va poder visitase hasta'l día 20 de xineru nel Muséu Arqueolóxicu d'Asturies

El Muséu Arqueolóxicu acueye dende güei la esposición 'Migravit', una amuesa que recuerda los comportamientos de la sociedá medieval énte la muerte.

La muerte ye unu de los fenómenos naturales que dende tiempos inmemorables intrigó al ser humanu, pero la forma d'entendela y d'asumila varió a lo llargo de la hestoria.

La esposición repasa cómo se concebía la muerte nel medievu, una dómina qu'ensin dulda tuvo marcada poles desigualdaes sociales. Una diferenciación que se reflexaba nel mesmu ritual de despidida, nes luxoses dotes  funeraries o na ostentación de los sepulcros, ente otros aspeutos.

Costumes y conceutos que, según les comisaries, nun variaron tanto a lo llargo de la hestoria.

La esposición somorguia al visitante nun  viaxe al traviés del tiempu p'afayar la realidá política, cultural y espiritual del periodu. Va poder visitase hasta'l día 20 de xineru nel Muséu Arqueolóxicu d'Asturies.