TPA cola cultura sidrera asturiana

Conexón Asturies sigue en directo l'esperáu momentu de la decisión de la Unesco

Güei, miércoles 4 d’avientu, los espectadores de TPA podrán ser testigos d’un momentu históricu: la resolución de la Unesco sobre la candidatura de la Cultura Sidrera Asturiana como Patrimoniu Cultural Inmaterial de la Humanidá.

Dientro del programa Conexón Asturies, siguiremos la retransmisión en directo del esperáu momentu de la decisión de la Unesco, conectando colos protagonistes en Paraguái pa conocer de primer mano’l resultáu. Amás, fadremos una conexón en directo col Muséu de la Sidra de Nava, epicentru d’esta xornada histórica, onde se vivirá l’ambiente y la emoción d’esti día clave.

Conexón Asturies tará atenta al ambiente festivu y al sofitu de la ciudadanía nesta xornada tan especial y recoyerá les primeres declaraciones de diferentes protagonistes. Y como ramu a esta cobertura, entamaremos una emocionante quedada global d’escanciáu, que xunirá a asturianos y asturianes d’otros continentes al traviés d’una conexón en Zoom.

Persones con raigaños asturianos participarán nun escanciáu simbólicu que destacará la universalidá de la nuestra cultura sidrera. Un día históricu pa xunir Asturies y el mundu al rodiu d’una de les nuestres tradiciones más emblemátiques: la sidra.