El Gobiernu da la Medaya d'Oru al Méritu na Investigación a Salas

Pionera, referente, trabayadora incansable, rigurosa, exemplu pa les muyeres, pa los mozos y, a la fin de la so vida, tamién pa los mayores pola so innagotable xera; tolos axetivos quedaron minúsculos pa rindir tributu y recordar a la investigadora Margarita Salas, pero sobro toos güei destacó unu: honestidá.

Foi nel penúltimu adiós a la científica, porque nos próximos díes van socedese los homenaxes y les reconocencies a Margarita Salas, muerta ayeri a los 80 años tres una vida dedicada a la investigación, desque entamó bien moza xunto al nobel Severo Ochoa na Universidá de Nueva York hasta'l final de los sos díes, porque inda diba, prácticamente a diario, al so llaboratoriu nel Centru de Bioloxía Molecular Severo Ochoa.

Hasta'l tanatoriu de La Paz, nel llugar madrilanu d'Alcobendas, averáronse nes últimes hores numberosos amigos, científicos y políticos, qu'emponderaron la trayectoria profesional de Margarita Salas, pero sobre manera la so talla humana, y toos celebraron y valoraron qu'esa reconocencia llegára-y en vida.

A les puertes del tanatoriu, el ministru de Ciencia, Innovación y Universidaes, Pedro Duque, adelantó que'l Gobiernu entamó yá a tramitar la concesión de la Medaya d'Oru al Méritu na Investigación a Margarita Salas.