Asiegu, Pueblu Exemplar de 2019, rememora’l so premiu ensin restricciones

Los vecinos de Cabrales recuerden cola mesma ilusión d’esi día la visita real

Güei, les miraes tán puestes en Somáu. Pero va un añu yera’l pueblu d’Asiegu, en Cabrales, el protagonista. 

Col móvil y una botella de sidra siguen los vecinos d’Asiegu’l Pueblu Exemplar d’esti añu. Fáenlo cola mesma emoción d’aquel 21 d’ochobre de 2019.

Siéntense afortunaos, dicen, por poder tar cerca de los reis y les sos fíes ensin restricciones sanitaries, y arguyosos porque se conoza cada vegada más el so pueblu.

Foi un día de primeres vegaes pa los vecinos, pero tamién pa la princesa Leonor. La so primer visita, placa conmemorativa y discursu nun Pueblu Exemplar. El pueblu cabraliegu onde tamién recibió, cola so hermana, el primer regalu: un tapete de manes de Chelo y Águeda Bueno, vecines d’Asiegu.

Anque nun se-yos escaez la lluvia y la ñublina, invitaos inesperaos que privaron a la familia real de ver los paisaxes dende’l corredor de Marcelina.

Poro, estos vecinos exemplares nun pierden la esperanza de que vuelvan pa esfrutar d’esta vista privilexada d’El Picu Urriellu que nos ufierta.