Emoción nel primer actu de la corporación de Llanes tres la muerte de Javier Ardines

IU convoca una concentración en memoria del conceyal

Izquierda Xunida convocó pal próximu martes una concentración silenciosa énte'l Conceyu de Llanes en memoria del so únicu conceyal na corporación llanisca, Javier Ardines, y como repulsa escontra la violencia dempués de que'l conceyal morriera asesináu'l pasáu xueves cabo so casa.

Según informó la coalición, nesi actu lleóse un manifiestu ellaboráu pola agrupación d'IX Llanes que va ser "la única declaración pública que se faiga, atendiendo a la difícil y doliosa situación que viven tanto los sos compañeros de partíu, amistaes y, sobre manera, la so familia".

Los responsables de la coalición en Llanes fixeren ayeri un llamamientu a la tranquilidá y pidieron "la máxima prudencia" a los militantes de la coalición a la espera de qu'avance la investigación pa esclariar la muerte d'Ardines, de 52 años.

A la conmoción xenerada en Llanes refirióse tamién l'alcalde de Llanes, Enrique Riestra, que coincidió güei, visiblemente emocionáu, col restu de miembros de la corporación municipal nel Certame de la Güerta de Posada de Llanes.

"Ye mui malo d'asimilar y yá va haber tiempu pa espresase. Vamos siguir los pasos que nos diga la familia de Javier y la so familia política, que ye Izquierda Xunida, vamos respetar les sos decisiones y vamos siguir trabayando polo que Javier quería", señaló Riestra, de Vecinos por Llanes, que preside la corporación al mandu d'un gobierno cuatripartitu con PP, Foro y IX.

Tres díes depués de la muerte del edil la Guardia Civil sigue pescanciando datos pa esclariar l'asesinatu del edil, que morrió en recibiendo dellos golpes na cabeza y qu'ayeri foi enterráu nuna ceremonia íntima por espresu deséu de la familia.

El cuerpu d'Ardines foi alcontráu a unos centenares de metros de la so vivienda en Belmonte de Pría, sobre la calzada que daba accesu al inmueble, y la so furgoneta, parada pero col motor encendíu, foi alcontrada a 70 metros del calabre.

El secretariu xeneral del PP d'Asturies tamién se refirió en Posada al asesinatu de Javier Ardines. Luis Venta cree que ye tiempu de dexar trabayar a les fuerces de seguridá pa que resuelvan un socesu que provoca la repulsa xeneral.