Los Reis visiten Mual, Pueblu Exemplar d'Asturies 2018

Los habitantes de Mual esfuércense por caltener tradiciones, caltener y recuperar patrimoniu

El rei rindió güei homenaxe al papel de les muyeres del mundu rural por sofitar la vida cotidiana décades con "un esfuerzu y un sacrificiu exemplares", a pesar de tantes dificultaes a les que tuvieron que facer frente pol entornu y la so condición social.

Felipe VI espresó esta reconocencia na so visita, xunto a la reina Letizia, a l'aldega de Mual, galardonada anguaño col Premiu al Pueblu Exemplar d'Asturies 2018 en reconocencia al llabor que'l so centenar de vecinos fai por caltener les tradiciones y la so privilexada natura.

El percorríu per Mual, qu'incluyó una curtia visita al cercanu monte de Muniel.los, zarró los actos nos que don Felipe y doña Letizia participaron dende'l xueves por cuenta de los Premios Princesa d'Asturies.

Nun día frescu, con sol dacuando, Mual volcóse cola visita real engalanada con banderes d'España y d'Asturies. A lo llargo de la única cai, don Felipe y doña Letizia fueron parando en dellos puntos pa charrar colos vecinos y conocer les sos costumes.

Nun horru, un matrimoniu enseñólos a enrestrar cebolles y doña Letizia escaxinó fabes tres les instrucciones recibíes. Tamién-y amosaron una semeya del príncipe con trece años qu'él dedicó al so fíu dempués de que-y unviara una carta dende'l colexu del pueblu.

El momentu más llamativu protagonizólu'l rei cuando s'animó a xugar al bolu vaqueiru, unu de los deportes rurales más enraigonaos n'Asturies. A pesar de dir vistíu de traxe, Felipe VI garró la bola de madera de más de dos quilos, llanzó con fuerza y valtó la mayoría de los bolos, asitiaos a unos seis metros, énte'l plasmu de la reina y de los vecinos.

Los Reis llevaron de Mual una bona montonera de regalos, como miel, sidra, xabones naturales y una talla de madera. Tamién cuatro camisetes, dos d'elles pa les sos fíes, Leonor y Sofía, de la carrera de monte que tolos años entamen pela carbayera de Muniel.los.

Al monte, declaráu Reserva de la Biosfera pola Unesco, averáronse darréu p'almirar la carbayera más grande d'España y unu de les meyor calteníes d'Europa. Cola so madera construyéronse nel so día dellos barcos de l'Armada Invencible.

La tradicional comida de campu que los Reis compartieron colos vecinos nuna carpa punxo'l broche a la visita, que s'allargó más de tres hores.