Primeros resultaos de les exhumaciones feches en Gozón y Pravia

Mapa de fuexes comunes n'Asturies

Alcontraos resclavos de güesos óseos nes dos fuexes comunes que güei s'abrieron n'Asturies. Primer escavación en cuasi diez años y tanto na de Pravia como na de Gozón atoparon resclavos. Nesta última, inesperaos amás porque buscábase a tres muyeres, y lo qu'apaecieron agora son resclavos d'un varón.

El trabayu ye fondu y tien que facese con procuru. Un equipu de 40 persones, lideraos pol forense Francisco Echeverría participen nestos trabayos.

La segunda fuexa na que güei se buscaron, ta n'Agones, en Pravia, y los trabayos tamién dieron frutos. Apaecieron resclavos óseos que paecen conseñar que los testimonios recoyíos hai cuasi 80 años conseñaron con fondura'l sitiu onde fueron tiraos Manuel y Ángel, dos hermanos de 31 y 20 años, abatíos por un grupu de falanxistes, en 1937.

Los güeyos de Jesús busquen un descansu nesta tierra, la que, según-y contó so madre, guarda los cuerpos de so padre y so tíu. El so hermanu pequeñu Ángel conversa, nerviosu tamién, con vecinos y familiares.

En 1937, un vecín foi obligáu a cavar la tumba y dio testimoniu, depués, a la madre d'Ángel y Jesús. El resultáu de les exhumaciones valdrán pa honrar la so memoria nuna tierra qu'al fin-yos seya leve.

Mapa de les fuexes comunes n'Asturies

Un estudiu universitariu de 2010 estima qu'hai 345 enterramientos n'Asturies. Nueve de cada 10 correspuenden a represaliaos del Franquismu y otros 21 a cayíos en combate. Tán en 55 conceyos pero l'área central concentra la mayoría. Los espertos creen que ye porque fueron los que tuvieron más carga política y resistencia obrera.

El cálculu ye que la represión dexó 8.000 muertos na comunidá. Y anque la mayoría tán en cementerios, otros 2.000 podríen tar en fuexes comunes. L'estudiu nun recueye los enterramientos de los sublevaos.

Tampoco inclúi a los cayíos en combate porque son tantos, espliquen, qu'amosaríen cuasi una zona continua.