TPA estrena l'espaciu 'Ciencia en 60 segundos'

Seis científiques asturianes falen de la so actividá con claridá y cercanía

Coincidiendo cola celebración del Día Internacional de la Muyer y la Neña na Ciencia, entama en TPA l'espaciu 'Ciencia en 60 segundos'. Pequeñes píldores de cinco minutos nes que seis científiques asturianes van falar de la so actividá con claridá y cercanía.

Soraya Calvo ye profesora nel departamentu de Ciencies de la Educación de la universidá d'Uviéu y sexóloga. Nel espaciu 'Ciencia en 60 segundos' va presentar una investigación sobro los problemes de la comunicación cuando se busquen relaciones afeutives en redes sociales. Pa ella la mayor dificultá foi especializase en sexoloxía siendo muyer y moza.

Ana Navarro ye Catedrática del área de Bioloxía Celular. Ella va tocar la importancia de los bonos vezos p'avieyar con una cabeza clara. Cree que'l mayor retu como muyer na carrera científica ye conciliar vida personal y profesional.

Dambes creen que pese a qu'hai munches muyeres nes sos especialidaes, la mayor torga ye algamar los puestos de más responsabilidá.

Elles y otres cuatro científiques de rellumu van apurrinos pequeñes píldores de la so conocencia cada nueche a les 20:25, enantes de la segunda edición de TPA Noticies. Tolos díes hasta'l 16 de febreru.