Asturies clama escontra la violencia machista: 'Que la vergoña camude de bandu'

'Asturies 8M' recalca la necesidá d'acabar "col mieu y la vergoña qu'oprime a les víctimes" y "de romper col pactu patriarcal de silenciu que protexe a los agresores"

El Día Internacional de la Eliminación de la Violencia escontra la Muyer axuntó esti llunes n’Uviéu a centenares de persones que se manifestaron pa esixir el fin de les violencies machistes.

Baxo’l lema "Que la vergoña camude de bandu", los asistentes salieron de la estación de tren de la capital del Principáu y percorrieron dalgunes de les principales cais de la ciudá hasta llegar a la plaza de la Constitución.

Na marcha, coordinada pola plataforma 'Asturies 8M', los asistentes amosaron, al ritmu de batucaes, pancartes con consignes como 'Porno = escuela de violadores', 'Basta yá. El Machismu mata' o 'Nun ye un casu aislláu, llámase patriarcáu'.