El centru pa víctimes d'agresiones sexuales de La Corredoria va abrir el 18 d'avientu

Llamedo: "La violencia machista ye un problema estructural que tenemos d'abordar dende tolos frentes"

El nuevu Centru de Crisis pa Víctimes d'Agresiones Sexuales, allugáu nel barriu de La Corredoria, n'Uviéu, va abrir les sos puertes el próximu 18 d'avientu, anunció esti llunes la vicepresidenta del Principáu, Gimena Llamedo, nel actu institucional de conmemoración del Día Internacional de la Eliminación de la Violencia escontra les Muyeres, celebráu n'A Caridá (El Franco).

La vicepresidenta adelantó que'l presupuestu autonómicu pa 2025 va reforzar esti equipamientu con un grupu adicional d'especialistes, formáu por una psicóloga, una abogada y una trabayadora social, y con servicios anovadores, como terapies grupales, acompañamientu n'itinerarios d'insertamientu social y programes de sensibilización y formación.

El centru de crisis, que güei cumple cuatro años, atendió dende entós a 1.122 persones, de les que 767 fueron víctimes de violencia machista.

“La violencia machista ye un problema estructural que tenemos d'abordar dende tolos frentes: atención, prevención y educación”, apuntó la vicepresidenta, que punxo en valir les meyores llograes nes postreres dos décades, dende l'aprobación de la Llei Orgánica de Midíes de Protección Integral escontra la Violencia de Xéneru.

Llamedo recordó amás los recursos colos que cunta'l Principáu p’atender a les víctimes: dende la Rede de Cases d'Acoyida, cola Casa Malva como buque insignia, a la de los 18 Centros Asesores de la Muyer, a los que los presupuestos autonómicos del próximu añu van destinar 1,2 millones d'euros.

En materia de prevención, punxo de relieve'l programa Coeducastur, qu'esti cursu va llegar a 50 centros educativos asturianos, y el compromisu asumíu pol Principáu col desaniciu de la trata y la prostitución, que va cuntar bien llueu con una nueva estratexa basada nun estudiu especializáu.

Asturies sigue liderando iniciatives pioneres na llucha escontra la violencia de xéneru.