'Makelele' declara mañana na Audiencia Provincial pola muerte de Mitre

Fiscalía pide 15 años de cárcel pa él

Abdou Ndiaye conocíu como 'Makelele' sentaráse mañana nel bancu, acusáu del delitu d’homicidiu de la so ex-compañera sentimental, la hostelera de Xixón Sonia Meléndez Mitre, pol que la Fiscalía pide 15 años de cárcel pa él.

Los fechos, que se xulgarán na sección octava de l’Audiencia Provincial, socedieron en xunetu de 2015. Makelele entamare a trabayar nel local de Sonia y tiempu dempués entamaríen una rellación sentimental.

Un añu dempués foi la propia Sonia, de 48 años la que según sostién la Fiscalía, decidió poner fin a esa rellación pol calter autoritariu y de control y dominación qu’él exercía sobre ella.

Teníen munches griesques tanto no personal como no económico porque Makelele quería tamién controlar los negocios de la so pareya.

La situación llegó a tal puntu que la víctima decidió despedilu’l 14 de xunetu de 2015. Enantes, dellos testigos aseguraron que nuna d’eses griesques públiques de la pareya, Makelele llegó a amenazar que la mataría.

Dos díes dempués foi a casa de Sonia y acabó cola so vida estrangulándola y golpeándo-y la cabeza.

Foi prindáu’l día 16 pero dempués de prestar declaración foi puestu en llibertá por falta de pruebes. A finales de setiembre yera prindáu otra vuelta.

Dende entós Makele, de 35 años y natural de Senegal, ta en prisión provisional y siempre defendió la so inocencia.