Ardines foi golpiáu "con intensidá" na cabeza y dempués estranguláu

Los forenses que llevantaron el cadabre del conceyal declaren na Audiencia d'Uviéu

Los médicos forenses aseguraron esti martes que’l conceyal d’IX de Llanes Javier Ardines morrió por un shock causáu por una hemorraxa intracranial dempués de ser golpiáu con intensidá na cabeza con un oxetu contundente y dempués estranguláu.

Los forenses que fueron a la parroquia de Belmonte de Pría (Llanes) pa llevantar el cadabre declararon esti martes na Audiencia d’Uviéu nel xuiciu con xuráu popular que se sigue escontra Pedro N. A., como presuntu inductor; Maamar K. y Djilali B., como supuestos sicarios, y Jesús M., como intermediariu.

L’autopsia dexó afitar la muerte d’Ardines, que nun foi nel actu, sobre les 6:30 del 16 d’agostu de 2018, dixeron los forenses, qu’amestaron que "dende’l puntu de vista médicu" nun se pue precisar cuántes persones intervinieron na agresión.