Aumenta'l númberu d'usuarios del tresporte públicu pol combustible

Los asturianos dexen el coche y opten por buses y trenes p'aforrar

La movilidá, la forma en que nos movemos ta cambiando. Asturies dexa'l coche y xúbese al tresporte públicu. Esta selmana'l tresporte interurbanu medró más del 3% al respective de la mesma selmana de febreru. Les consecuencies de la crisis del combustible tán llevando a que los viaxeros miren más el bolsu, pero tamién a dir enantes pa tener plaza n'hora punta o recalcular trayectos.

Les estaciones d'autobuses cada vez tán más llenes. Xente que busca aforru y dalgunos, son tamién nuevos pasaxeros.

No que llevamos de mes, los servicios del Consorciu de Tresportes d'Asturies (CTA) atropen cuasi 120.000 usuarios. La media diaria del tresporte interurbanu yá ye superior a los dos meses previos.

Amás, los datos per selmanes, amuesen una medría entá mayor. Agora hai un 3,2% más de demanda que na mesma selmana de febreru.

Les cifres entá nun son les previes a la COVID-19. Y, por casu, el bus urbanu d'Uviéu sigue con un 15% menos qu'en 2019. Dende TUA aseguren qu'estos díes nun notaron demasiaos cambeos pero'l 10 de marzu algamaron cifres récord d'usuarios d'anguaño, 37.405 persones.

Amás, los viaxeros tamién son más previsores, por mieu a quedar ensin plaza, porque hai quien afirma que'l serviciu emprestáu polos autobuses tien demasiaes incidencies.

Pese a les quexes pola calidá, el bus ta ganando usuarios pola rentabilidá del tresporte públicu yá que, pel momentu, el preciu de los billetes sigue siendo'l mesmu.