El 3 de setiembre la Guardia Civil yá tenía nel puntu de mira a Pedro Nieva

Foi determinante un audiu col que l’acusáu afitare la infidelidá

El 3 de setiembre pasáu, 18 díes dempués de que mataren a Javier Ardines en Llanes, la Guardia Civil entamó yá una llinia d’investigación sobre Pedro Nieva, primu políticu de la víctima.

Pa ello foi determinante que la fía d’Ardines entregare a los axentes la grabación que-y unviare Nieva’l 5 d’agostu, 11 díes enantes del crime. Yera un audiu d’una conversación ente la muyer de Nieva y l’edil asesináu. Una charra cola que l’acusáu afitare la infidelidá.

La policía xudicial de la comandancia de la Guardia Civil de Xixón y los axentes de la Unidá Central Operativa, que trabayaron n’equipu nos seis meses d’investigación, tuvieron que facer un gran trabayu, y con munchu procuru, d’análisis y cruce de datos pa identificar, rellacionar y asitiar los teléfonos de los supuestos autores del asesinatu.

Nesi procesu, los axentes detecten un movimientu de Pedro Nieva que resulta fundamental pa esclariar los fechos. Ye’l 27 de xunetu, cuando’l supuestu autor intelectual del crime va ensin motivu aparente y xunto a otres dos persones, dende’l País Vascu a Llanes. La Guardia Civil identifica un segundu dispositivu que comparte tiempu y espaciu col de Pedro Nieva y que los lleva hasta Jesús Muguruza.

Al llamalu a declarar como testigu n’avientu, esti reconoz que Pedro Nieva quixo da-y dineru por dar una paliza a Ardines, daqué que refuga. Na so declaración fala de cómo lu punxo en contactu colos arxelinos.

Nel rastrexu de les cámares de la autovía ente’l País Vascu y Asturies, identifícase’l vehículu nel que se desplazaron los supuestos autores de la muerte del conceyal.

La Fiscal Superior del Principáu, Esther Fernández, recuerda que sedrá un xuráu popular el que xulgue’l crime de Javier Ardines y pide prudencia pa evitar contaminaciones. A día de güei, asegura, la investigación ta na so fase inicial.