El Ministeriu d'Industria va falar con Vesuvius pa negociar el futuru

Los trabayadores van llevar el conflictu a Europa y van atacar la reputación de la multinacional

Xunta en Madrid esta mañana de representantes de la plantiya de Vesuvius y de CCOO con responsables del Ministeriu d'Industria.

Un alcuentru del que salió un compromisu d'Industria pa ponese en contactu cola dirección de la empresa y intentar formar una mesa tripartita de negociación.

Esta primer toma de contactu foi positiva, según los representantes de Vesuvius, que taben contentos y esperanzaos a la salida de la xunta.

El Ministeriu amosó-yos el so interés y sofitu pa evitar la perda de texíu industrial que supondría'l zarru de les plantes de Llangréu y Miranda, y comprometióse a llamar a la dirección de la compañía p'afitar una mesa tripartita y abrir asina un nuevu marcu de negociación.

Los representantes de la plantiya de Vesuvius aseguren que quieren dialogar, que tán abiertos a cambeos, que puen adaptase, pero lo que nun van dexar ye que s'execute l'ERE y se dea'l zarru d'estes dos plantes que, aseguren, son rentables y nun puen dexase escapar.

D'equí p'alantre queden pendientes de la convocatoria d'esa mesa pero mientres, señalaron, van siguir concenciando a los vecinos y caltienen la marcha a Uviéu del próximu martes.