El plenu del Ayuntamientu de Llanes toma conocimientu de la muerte d’Ardines

Comunícase oficialmente l’arrenuncia de Rogelio Marotías

El plenu del Ayuntamientu de Llanes dio güei cuenta oficialmente del finamientu del edil d’IX, Javier Ardines, que foi’l pasáu día 16, y de l’arrenuncia del númberu dos de la coalición a ocupar el puestu que dexó vacante na corporación.

El plenu, que contaba con esos dos únicos puntos nel orde del día, celebróse pasaes les nueve la mañana y duró unos pocos minutos.

Ardines, de 52 años y padre de dos fíos, foi asesináu de dellos golpes na tiesta la madrugada del xueves, 16 d’agostu, cuando acababa de salir de so casa, na parroquia de Pría, pa dir faenar col barcu col que se ganaba la vida, porque arrenunciare al so sueldu como conceyal de Mediu Rural, Sableres y Personal.

El siguiente na llista cola qu’IX se presentó a les elecciones municipales de va tres años yera’l secretariu xeneral de CCOO del Oriente, Rogelio Marotías, que yá nun forma parte de la coalición y qu’arrenunció a ocupar el puestu que quedare vacante.

Sedrá la tercera na llista municipal, Priscila Alonso, la que, de mano, sedrá propuesta pa ocupar el llugar d’Ardines como edil d’IX.

Doce díes dempués del asesinatu d’Ardines, la Guardia Civil sigue atropando pruebes y testimonios pa tratar d’alcontrar al autor o autores d’un crime del que nun se conocen los motivos.

El so cuerpu foi alcontráu por un vecín a poco más de dos centenares de metros de la so vivienda y mui cerca de la so furgoneta, qu’entovía siguía en marcha, y de tres valles d’obra que la Guardia Civil cree que fueron colocaes en metá del camín vecinal pa tende-y una trampa y obligalu a baxar del vehículu.

L’oxetu contundente col que recibió, polo menos, tres fuertes golpes na tiesta, nun lu alcontraron entovía los investigadores.