Entama la negociación del ERE de Sekurit

La compañía propón 89 despidos directos y la supresión d'ente 110 y 120 trabayos n'empreses auxiliares

La dirección de Saint-Gobain y el comité d’empresa aconceyen güei pa entamar el periodu formal de consultes del espediente d’estinción de trabayu na llinia de fabricación de parabrises d’Avilés.

Les postures tán enfrentaes. Mientres la compañía asegura que’l pieslle ye inevitable y nun contempla la posibilidá de siguir l’actividá, los sindicatos defenden la so viabilidá y responsabilicen a la dirección de dexar morrer la planta.

La compañía propón 89 despidos directos, amás de la supresión d’ente 110 y 120 trabayos n’empreses auxiliares. Les dos partes tienen un plazu de 30 díes p’algamar un alcuerdu sobre les condiciones del despidu.

En paralelu a esta negociación, l’asamblea de trabayadores acordó convocar tres díes de fuelga pa la selmana viniente: del martes 30 d’abril al xueves 2 de mayu.