Foro va sofitar el presupuestu tres consiguir dar carpetazu al intercambiador de Xixón

Los presupuestos van quedar aprobaos col sofitu de socialistes, IX-Convocatoria por Asturies y el Grupu Mistu

Foro va sofitar finalmente'l proyectu de llei de presupuestos del Principáu pa 2024 en llegando a un alcuerdu in extremis pa retirar la partida de 2,5 millones d'euros y dar "carpetazu" al proyectu d'intercambiador de tresportes de L'Humedal, en Xixón, que finalmente nun se llevará alantre.

Los presupuestos, que xuben a más de 6.348 millones d'euros, un 6,3% más que l'actual, van quedar asina finalmente aprobaos col sofitu de socialistes, IX-Convocatoria por Asturies y de los dos diputaos qu'integren el Grupu Mistu: la diputada electa por Podemos, Covadonga Tomé, y el secretariu xeneral de Foro, Adrián Pumares.

Esti postrer reconoció que la balanza inclinóse güei hacia'l sí en consiguiendo'l sofitu de socialistes y IX -el PP abstúvose y Vox votó a la escontra- a la enmienda parcial que presentara en solitario pa que los fondos europeos que se diben a destinar al intercambiador de tresportes albentestate de L'Humedal s'empobinen a otros proyectos de movilidá.

"Cuntar con una partida tan importante pa un proyectu lesivu pa Xixón y Asturies fixera mui difícil el votu favoratible de Foro", señaló Pumares nuna rueda de prensa na que tuvo acompañáu pola presidenta del partíu y alcaldesa de Xixón, Carmen Moriyón.