L'usu del asturianu na Xunta enfrenta al Gobiernu con PP, Cs y Vox

La presidencia de la mesa pide a Berta Piñán qu'use'l castellán

L'usu de la llingua asturiana por parte de la nueva conseyera de Cultura, Política Llingüística y Turismu del Principáu, Berta Piñán, xeneró esti martes les quexes de PP, Ciudadanos y Vox, qu'obligaron a que la so intervención énte'l parlamentu rexonal fuera en castellán.

PP y Vox espresaron les sos protestes al entamu de la intervención de Piñán cuando ésta entamó a esponer les llinies xenerales de la so acción de gobiernu n'asturianu.

La diputada popular Gloria García esixó la traducción simultánea pol so "derechu" a entender a la titular de Cultura, mientres que'l de Vox, Ignacio Blanco, amenazó con abandonar la sala y inclusive propunxo que, si diba usase una llingua non cooficial, podría optase pol inglés pal meyor entendimientu de toos.

Dende Ciudadanos tamién s'acusó a la conseyera de facer "puru teatru", porque yá se-y alvirtiera va díes que l'usu del asturianu na cámara ye una prerrogativa reservada a los parllamentarios.

Piñán cuntó col respaldu del grupu parlamentariu de Podemos. El so diputáu Rafael Palacios protestó polo que consideró una "censura".

Finalmente, la presidencia de la mesa pidió a la conseyera qu'usara'l castellán pa espresase apelando al reglamentu de la cámara, que da a los diputaos el derechu a usar l'asturianu nel exerciciu de les sos funciones parlamentaries, pero nun menta a otros comparecientes, incluyíos los miembros del Gobiernu.