La Fiscalía retira los cargos escontra les dos muyeres acusaes de collaborar col clan de los Sandulache

Dambes yeren amás víctimes de los cabezaleros

La Fiscalía retiró güei los cargos escontra les dos muyeres qu'encaraben penes de 99 años de prisión, acusaes de pertenecer a una organización de trata de seres humanos liderada polos hermanos Sandulache.

L'acusación pública basó la so decisión nel fechu de que dambes acusaes yeren amás víctimes de los cabezaleros.

Les defenses espresaron güei énte'l tribunal de l'Audiencia Provincial que les dos moces van sufrir una doble victimización, al ser xulgaes pola so pertenencia a una organización y nun ser indemnizaes na so condición de perxudicaes.

La Fiscalía presentó güei les sos conclusiones y caltuvo invariable la pena pa los otros cuatro acusaos con pidimientos de pena d'hasta 128 años de prisión.

L'acusación pública sostuvo que la organización llegó a llograr beneficios qu'algamen los cinco millones d'euros de l'actividá desendolcada poles moces a les que traxeron a España pa exercer la prostitución dende Rumanía ente 2010 y 2013.

Les dos acusaes, según la versión de la Fiscalía, actuaron coaccionaes poles amenaces de los demás miembros de la organización y exercíen el control sobre les otres muyeres, que taben en tou momentu vixilaes.

Esta versión foi desmentida pol abogáu Ricardo Álvarez Buylla, defensor d'unu de los supuestos cabezaleros, que presentó como prueba de que les muyeres teníen llibertá de movimientu unes fotografíes de delles de les víctimes na sablera de Xixón, n'agostu de 2013, que foi almitida pol tribunal y impugnada pola Fiscalía.

El xuiciu va siguir el próximu 5 de payares, a les 10:30, coles conclusiones de l'acusación particular y les defenses.