La dirección de Saint-Gobain da anuncia del pieslle de la so división de parabrises na fábrica d'Avilés

Caltién l'actividá en Glass con una inversión de 5 millones

La multinacional francesa del vidriu Saint-Gobain dio anuncia esti llunes de la so decisión de zarrar la división Sekurit, dedicada a la fabricación de parabrises pa coches, de la so factoría d’Avilés, que da trabayu anguaño a unos 160 trabayadores, según los sindicatos.

A falta de negociar col comité d’empresa, al que se-y comunicó oficialmente esta decisión güei, el procesu de pieslle d’esta división tendría que tar zarráu pal mes de xunu, una vegada acabaes les negociaciones colos sindicatos, según fontes de la compañía.

D’elles dependerá a cuántos trabayadores de la plantiya de Sekurit Avilés va afectar l’espediente de regulación de trabayu por cese d’actividá que va aplicar la empresa, qu’espera algamar "el menor impactu posible" sobre les persones afectaes.