L’Audiencia Provincial dexa en llibertá provisional a los acusaos del casu Renedo

Quítase-yos el pasaporte y tendrán que notificar cualquier cambéu de casa

L’Audiencia Provincial d’Uviéu dexó güei en llibertá provisional a los condergaos pol casu Renedo con penes que superen los 40 años de cárcel, refugando asina’l pidimientu d’ingresu en prisión fecha pola acusación particular llevada alantre por Podemos.

El tribunal dio anuncia d’esta decisión dempués de la celebración de l’audiencia prevista na Llei d’Enxuiciamientu Criminal onde comparecieron los cinco principales condergaos na causa, l’ex-conseyeru d’Educación José Luis Iglesias Riopedre; la so númberu dos nel departamentu, María Jesús Otero; la funcionaria Marta Renedo y los empresarios Alfonso Carlos Sánchez y Víctor Manuel Muñiz.

Na 'vistina' la Fiscalía pidió la llibertá provisional pa los condergaos, pidimientu al que s’amestaron les acusaciones particulares del Principáu y María Teresa Porrúa, asina como les populares de l’Asociación de Vecinos y Amigos de Llanes y el Partíu Progresista de Belmonte.

Les defenses de los cinco acusaos que comparecieron na vista pidieron tamién que s’aplicare’l criteriu de la Fiscalía y coincidieron en calificar de "política" el pidimientu fechu pol lletráu de l’acusación popular llevada alantre por Podemos al nun dase nenguna de les circunstancies previstes na llei pa decretar la prisión provisional pa los condergaos.

Dempués d’un recesu de 40 minutos, y en presencia de los cinco condergaos que refugaron intervenir na vista, el presidente del tribunal dio anuncia d’esta decisión y aceptó amás dos de les midíes cautelares pidíes pola Fiscalía.

Estes midíes consisten na retirada del pasaporte a los condergaos -que tendrán que dar el llunes viniente- y la obligatoriedá de notificar cualquier cambéu de casa tanto de calter temporal como definitivu.

El secretariu xeneral de Podemos, Daniel Ripa, la única acusación que pidía l’ingresu darréu en prisión, respeta la sentencia pero apunta que ye inesplicable que’l Principáu nun pidiere la entrada en prisión de los condergaos.