Riopedre y Otero declárense inocentes nes supuestes irregularidaes de material

Los empresarios d'Igrafo y APSA acuéyense al so derechu de nun declarar

L'ex-conseyeru d'Educación José Luis Iglesias Riopedre y la so númberu dos nel departamentu, María Jesús Otero, declaráronse güei inocentes énte la titular del Xulgáu d'Instrucción númberu 4 que los interrogó pola supuesta participación n'irregularidaes na entrega de material a colexos, según informaron fontes xudiciales.

Rioprede dixo a la xuez que'l trámite de les contrataciones de los materiales nun yera de la so competencia y que pasaba por tolos filtros de cada escalafón de la Conseyería hasta que llegaba a él pa roblar.

Los empresarios Víctor Manuel Muñiz (Igrafo) y Alfonso Sánchez (Almacenes Pumarín), que tamién son investigaos por esta causa, acoyéronse al derechu de nun declarar.

A entrugues de los periodistes al final de los interrogatorios, los sos abogaos Miguel Valdés Hevia y Javier Dapena, respectivamente, rechazaron que los sos veceros tuvieren dalgún tipu de connivencia con Riopedre y Otero.

Esplicaron que los sos defendíos nun declararon por "prudencia" al tar la investigación nun momentu "primeru" y, sobre manera, por ser "la reproducción de dalgo que yá se xulgó", en referencia al Casu Marea, nel que los cuatro investigaos tán tamién implicaos y que tán pendientes de conocer la sentencia.

Dapena afirmó que la fiscal del casu, que lleva los temes de corrupción, fai bien el so trabayu al presentar una denuncia al ver indicios de delitu énte la información que-y tresllada la alministración rexonal.

"Creo que l'actuación de l'alministración del Principáu nun ye nin lleal, ni ética, nin dende llueu consecuente xurídicamente porque nun tien sentíu dafechu", conseñó Dapena, qu'indicó que nesti casu hai "una motivación secundaria bastante cercana a lo político".

Per parte de so, Valdés Hevia señaló que l'actuación del Principáu ye más un actu de "neglixencia" qu'otros motivos políticos y esplicó que la instrucción dilataráse nel tiempu porque la xuez pidió los nomes de los 87 directores de los colexos.

Los cuatro, pendientes de la sentencia del casu Marea, la mayor causa de corrupción investigada n'Asturies pola axudicación irregular de contratos públicos a empreses, fueron llamaos a declarar pola titular d'esti xulgáu.

La nueva investigación parte de la denuncia interpuesta n'ochobre pola Fiscalía, a la que'l Principáu remitió un informe sobre supuestes irregularidaes nel material unviáu a 87 colexos de la rexón que xubía en cuatro millones d'euros el fraude d'estos cuatro procesaos nel casu Marea.

L'informe foi refugáu pol tribunal al entamu de la vista oral dempués de que la Fiscalía alvirtiera n'avientu de 2014 qu'esos cuatro acusaos podríen tener qu'indemnizar al Principáu, qu'en xunetu de 2015 abrió una investigación sobre'l material dau a 87 colexos ente 2009 y 2010 pa comprobar si lo que constaba como facturao foi entregáu a los centros.