Sigue activu’l protocolu por contaminación n’Uviéu y Llangréu

Na capital asturiana caltiénse’l nivel 1

El Gobiernu del Principáu caltién activu’l protocolu d’actuación en casu d’episodios de contaminación del aire na zona d’Uviéu y en Llangréu polos niveles altos de partícules en suspensión na atmósfera.

Según informó esti miércoles l’Executivu autonómicu, que punxo en marcha’l protocolu’l llunes, na capital asturiana caltiénse’l nivel 1, mientres que nes cuenques sigue activu’l preventivu.

El dispositivu actívase nel so nivel 1 cuando la concentración de partícules na atmósfera ye mayor de 5 microgramos per metru cúbicu (µg/m3) pa les partícules de diámetru inferior a 2,5 micres (PM2,5) o de 50 µg/m3 pa les que tienen un diámetru menor a 10 micres (PM10) tres díes siguíos en polo menos una estación de la zona.

D’alcuerdu colos datos recoyíos nes últimes hores nes estaciones de calidá del aire, la situación evoluciona "favoratiblemente", poro, prevése que mañana puea rebaxase’l nivel d’alerta n’Uviéu a "preventivu" y que progresivamente la situación dexe desactivar dafechu los protocolos, dixo’l Gobiernu asturianu.

Con ello, destacó que la meyoría de les condiciones evitó l’activación del protocolu na zona de Xixón.